Á næstu dögum er von á ekki færri en tveimur hitabylgjum. Fyrsti hápunkturinn er á morgun með 34 gráðum og á föstudaginn er spáð 37 gráðum. Eins gott að vera vel undirbúin/inn og vita um alla mögulega gosbrunna í borginni til að kæla sig.
Afar þægilegt er að láta fara vel um sig í skugga í almenningsgarði á slíkum hitadögum. Og ekki er verra ef garðurinn státar af gosbrunni eða jafnvel ökklahárri buslulaug – nema hvort tveggja sé!
Í Plansche í Weinberggarðinum í Mitte er afar skemmtilegur staður til að kæla sig á annars óbærilegum dögum. Seinnipart daga getur orðið fjölmennt þegar foreldrar koma saman með börn eftir leikskóla og því er hentugra að mæta fyrr fyrir þá sem hafa möguleika á því. Þegar kvölda tekur hættir að sprautast úr gosbrunnunum en það er áframhaldandi góð stemmning í garðinum, fólk er afslappað og nýtur lífsins. Þar í kring er líka allt til alls og alveg hægt að verja heilum degi á svæðinu. Nola’s veitingastaðurinn býður matseðil úr Ölpunum en einnig er þar að finna frábæran pall með útsýni yfir garðinn. Svo er stutt í ísbúðina Süsse Sünde en þar er hægt að fá himneska ísa.
Berlínur mæla með að finna sér kaldan stað á komandi dögum til að lifa hitabylgjurnar af.
Plansche – Weinbergpark, Weinbergsweg 11, 10119 Berlin – Mitte
Nola’s am Weinberg, Veteranenstraße 9, 10119 Berlin – Mitte
Süße Sünde, Weinbergsweg 21, 10119 Berlin – Mitte
Engar athugasemdir